Un lazo contra o cambio climático

O 22 de abril celébrase o Día da Terra. E diferentes organizacións ecoloxistas (Ecologistas en Acción, SEO/Birdlife, WWF/Adena, Greenpeace...) queren celebralo lucindo un lazo verde. Trátase dun xeito pacífico, pero visíbel, de protestar contra o dispendio de enerxía e o cambio climático e exhortar á acción a toda a cidadanía. Os ecoloxistas elixiron a cor verde porque representa a esperanza, a natureza e a vitalidade.
Este lazo verde é un símbolo para quen cre que non é posíbel seguir eludindo as nosas responsabilidades e que todos deberiamos participar de maneira activa na solución deste problema.
España segue a ser o país da Unión Europea que máis se afasta de cumprir os obxectivos do Protocolo de Kioto. As emisións de gases de efecto invernadeiro no noso país incrementáronse máis dun 52% respecto aos niveis de 1990, cando o compromiso era de non aumentalas en máis dun 15%. Este escenario pon de manifesto a insuficiencia e ineficacia das políticas emprendidas ata o momento para combater o cambio climático, o problema ambiental, económico e social máis grave ao que nos enfrontamos na actualidade.